Fàilte gu Apache OpenOffice

Tha OpenOffice 'na shreath de phrògraman oifis a bheir dhut cothrom aig gach goireas a dh'fheumas tu 'nad obair làitheil, eadar sgrìobhainnean teacsa, cliath-dhuilleagan, tarraingean, stòr-dàtannan is taisbeanaidhean gleansach - agus an rud air fad sa Ghàidhlig. Tha fiù dearbhair-litreachaidh Gàidhlig 'na bhroinn! Agus an rud as fhearr - cha chosg e sgillinn dhut oir tha e 'ga leasachadh le coimhearsnachd a dhaoine a dh'obraicheas air OpenOffice gu saor-thoileach. Leis a sin, fiù ma tha thu car teagmhach mu dhèidhinn, 's urrainn dhut greim fhaighinn air agus fheuchainn agus chan eil uallach sam bith 'na chois. Siuthad ma-thà!

Ma tha taic a dhìth ort a thaobh obrachadh a' phrògraim fhèin, feuch na duilleagan taice aig OpenOffice (sa Bheurla). Ma tha duilgheadas agaibh a tha co-cheangailte ris a' Ghàidhlig ann, can mur eil sibh buileach cinnteach mar a dh'obraicheas an dearbhair-litreachaidh no mur eil a' Ghàidhlig a' nochdadh air an sgrìn, gheibh sibh taic air Fòram na Gàidhlig san earrann teicneolais, ann am Beurla no Gàidhlig.

On a thug sinn iomradh air, seo freagairt air an dà cheist a nochdas as trice:

• Fhuair mi e ach tha e ann am Beurla

Tachraidh sin. Cha leig thu leas ach a dhol gu
Tools » Options » Language Settings » Language » User Interface agus Locale Setting agus Default languages agus Gaelic (Scotland) a thaghadh ann.
Bidh feum agad am prògram a dhùnadh an uairsin agus a chur gu dol a-rithist ach cha bheir sin fada.

• Càit a bheil an dearbhair-litreachaidh?

Tha e am broinn a' phrògraim o thùs is cha leig thu leas dad a dhèanamh. Ma thug thu air falbh e air mhearachd 's ma tha thu 'ga iarraidh air ais, gheibh thu an-seo e.